നബി (സ) യുടെ ജന്മദിനമായ മൗലിദുന്നബി ആചരിക്കുന്നതിനെ എതിർക്കുന്ന ചിലർ നിരന്തരം ഉന്നയിക്കുന്ന ഒരു സംശയമാണിത്: നബി (സ) യെ ഏറ്റവും അധികം സ്നേഹിച്ചിരുന്ന സ്വഹാബികൾ അദ്ദേഹത്തിന്റെ ജന്മദിനം ആഘോഷിച്ചിട്ടില്ല. അതിൽ എന്തെങ്കിലും നന്മ ഉണ്ടായിരുന്നെങ്കിൽ അവർ അതിലേക്ക് നമ്മേക്കാൾ മുമ്പേ കടന്നുവരുമായിരുന്നില്ലേ?

വാസ്തവത്തിൽ, ഈ വാദം ദുർബലമാണ്. അതിന് നാല് വിധത്തിൽ മറുപടി പറയാം:

ഒന്നാമത്:

പുതുതായി ഉണ്ടായ ഒരു കാര്യത്തെ വെറും “നബി (സ) യുടെ കാലത്ത് ഉണ്ടായിരുന്നില്ല” എന്ന കാരണത്താൽ മാത്രം ശരിയോ തെറ്റോ എന്ന് തീരുമാനിക്കാനാവില്ല. പകരം, അത് ഖുർആനും സുന്നത്തും ശരീഅത്തിന്റെ പൊതുതത്വങ്ങളും അംഗീകരിച്ചിട്ടുള്ള അടിസ്ഥാനങ്ങളും അനുസരിക്കുന്നുണ്ടോ എന്ന് പരിശോധിക്കുകയാണ് വേണ്ടത്.

ഒരു പുതിയ കാര്യം ഖുർആനിനോ സുന്നത്തിനോ ശരീഅത്തിന്റെ വ്യക്തമായ നിയമങ്ങൾക്കോ വിരുദ്ധമാണെങ്കിൽ, അത് അംഗീകരിക്കാനാവില്ല. എന്നാൽ, അതിൽ ഉൾപ്പെടുന്ന പ്രവർത്തനങ്ങൾ സ്വതവേ അനുവദനീയമായവയായിരിക്കുകയും, അവ ശരീഅത്തിന്റെ പൊതുതത്വങ്ങളോടും ലക്ഷ്യങ്ങളോടും യോജിക്കുകയും ചെയ്യുന്നുവെങ്കിൽ, അത് പുതിയൊരു രീതിയിലുള്ള ആചരണമായതിനാൽ മാത്രം തെറ്റാണെന്ന് പറയാനാവില്ല.

ഇമാം ശാഫിഈ (റ) ഇതേ ആശയം വളരെ വ്യക്തമായി പറഞ്ഞിട്ടുണ്ട്:

“പുതുതായി ഉണ്ടായ കാര്യങ്ങൾ രണ്ടുതരമാണ്. ഒന്നാമത്തേത്: ഖുർആനിനോ സുന്നത്തിനോ സ്വഹാബികളുടെയും സലഫുകളുടെയും അംഗീകരിക്കപ്പെട്ട നിലപാടുകൾക്കോ ഇജ്മാഇനോ വിരുദ്ധമായ പുതുമകൾ. അവ വഴിതെറ്റിക്കുന്ന ബിദ്അത്തുകളാണ്. രണ്ടാമത്തേത്: നന്മയുടെ ഭാഗമായി പുതുതായി ഉണ്ടായതും ഖുർആനിനോ സുന്നത്തിനോ സലഫുകളുടെ നിലപാടുകൾക്കോ ഇജ്മാഇനോ വിരുദ്ധമല്ലാത്തതുമായ കാര്യങ്ങൾ. അവ അപലപിക്കപ്പെടാത്ത പുതുമകളാണ്.”

മൗലിദിന്റെ സദസ്സിലേക്ക് നോക്കുമ്പോൾ, അതിൽ സാധാരണയായി ഖുർആൻ പാരായണം, നബി (സ) യുടെ സീറ പഠിക്കൽ, നബി (സ) യെ പുകഴ്ത്തുന്ന മദ്ഹുകൾ ആലപിക്കൽ, ഭക്ഷണം വിതരണം ചെയ്യൽ തുടങ്ങിയ കാര്യങ്ങളാണ് നടക്കുന്നത്. ഇവയെല്ലാം ശരീഅത്ത് അനുവദിച്ചിട്ടുള്ള നന്മകളാണ്.

അതിനാൽ, ഒരു പുതിയ രീതിയിലുള്ള സംഗമം ശരീഅത്തിന്റെ പൊതുതത്വങ്ങളോട് യോജിക്കുന്നതായി തെളിഞ്ഞാൽ, സ്വഹാബികൾ ആ പ്രത്യേക രീതിയിൽ അത് ചെയ്തിട്ടില്ല എന്നത് മാത്രം അതിനെ നിരോധിതമാക്കുന്നില്ല. കാരണം, നബി (സ) നേരിട്ട് ചെയ്യാതിരുന്നിട്ടും ശരീഅത്തിന്റെ പൊതുവായ തത്വങ്ങളിൽ ഉൾപ്പെട്ട നിരവധി കാര്യങ്ങൾ സ്വഹാബികൾ ചെയ്തിട്ടുണ്ട്. അതുപോലെ, സ്വഹാബികൾ ചെയ്യാതിരുന്ന ചില കാര്യങ്ങൾ താബിഉകൾ ചെയ്തിട്ടുമുണ്ട്; പിന്നീടുള്ള തലമുറകളും ഇതേ രീതിയിൽ പല കാര്യങ്ങളും ചെയ്തിട്ടുണ്ട്.

രണ്ടാമത്:

നബി (സ) യുടെ ജനനദിനത്തോടുള്ള പ്രത്യേക പരിഗണനയ്ക്ക് അടിസ്ഥാനമുണ്ടെന്ന് നബി (സ) തന്നെ സൂചിപ്പിച്ചിട്ടുണ്ട്.

തിങ്കളാഴ്ച നോമ്പ് നോക്കുന്നതിന്റെ കാരണത്തെക്കുറിച്ച് ചോദിക്കപ്പെട്ടപ്പോൾ നബി (സ) പറഞ്ഞു:

“അത് ഞാൻ ജനിച്ച ദിവസമാണ്.”

സ്വഹാബികൾ നബി (സ) യുടെ ഈ മാർഗനിർദേശം അനുസരിച്ച് തിങ്കളാഴ്ച നോമ്പ് അനുഷ്ഠിച്ചിരുന്നു.

അതിനാൽ, മൗലിദിൽ പുതുതായി ഉണ്ടായത് നബി (സ) യുടെ ജനനദിനത്തെ ഓർക്കുന്നതോ, അദ്ദേഹത്തോടുള്ള സ്നേഹവും ആദരവും പ്രകടിപ്പിക്കുന്നതോ അല്ല. മറിച്ച്, ഖുർആൻ പാരായണം ചെയ്യുക, നബി (സ) യുടെ സീറ പഠിക്കുകയും അനുസ്മരിക്കുകയും ചെയ്യുക, മദ്ഹുകൾ ആലപിക്കുക, ഭക്ഷണം വിതരണം ചെയ്യുക തുടങ്ങിയ അനുവദനീയമായ നന്മകൾക്കായി ഒരു പ്രത്യേക സമയത്ത് ആളുകൾ ഒരുമിച്ചുകൂടുന്ന സംഗമരീതിയാണ് പിന്നീട് രൂപപ്പെട്ടത്.”

മൂന്നാമത്:

സ്വഹാബികൾ നബി (സ) യുടെ ജീവിതചരിത്രം അവരുടെ ദൈനംദിന ജീവിതത്തിന്റെ ഭാഗമായിട്ടാണ് ജീവിച്ചിരുന്നത്. അവർ നബി (സ) യുടെ ജീവിതം സ്വന്തം മക്കൾക്കും അടിമകൾക്കും പഠിപ്പിച്ചിരുന്നു; ഖുർആനിലെ ഒരു സൂറത്ത് പഠിപ്പിക്കുന്നതുപോലെ തന്നെയായിരുന്നു അത്.

നബി (സ) യുടെ ജീവിതം അവരുടെ മനസ്സുകളിൽ നിരന്തരം സജീവമായിരുന്നതിനാൽ, ഹബീബിനെ ഓർമ്മിപ്പിക്കുന്നതിനായി പ്രത്യേക അവസരങ്ങളോ കാലങ്ങളോ അവർക്ക് ആവശ്യമായിരുന്നില്ല. കാരണം, നബി (സ) യുടെ സീറയും ജീവിതചരിത്രവും അവർ നിരന്തരം പഠിക്കുകയും ഓർക്കുകയും, തങ്ങളുടെ ദൈനംദിന ജീവിതത്തിൽ അതനുസരിച്ച് ജീവിക്കുകയും ചെയ്തിരുന്നു.

നാലാമത്:

മൗലിദ് സദസ്സ് സംഘടിപ്പിക്കുന്നതിന്റെ പ്രധാന ലക്ഷ്യങ്ങളിൽ ഒന്നാണ് നബി (സ) യുടെ മഹത്തായ ജീവിതവും സീറയും പഠിക്കുകയും, തന്റെ ദൂതനെ നമ്മിലേക്ക് അയച്ചുതന്ന മഹത്തായ അനുഗ്രഹത്തിന് അല്ലാഹുവിനോട് നന്ദി പ്രകടിപ്പിക്കുകയും ചെയ്യുക എന്നത്.

ഈ ലക്ഷ്യത്തിന്റെ അടിസ്ഥാനരൂപം സ്വഹാബികൾ തന്നെ നിർവഹിച്ചിരുന്നു. നബി (സ) യിലൂടെ ലഭിച്ച അല്ലാഹുവിന്റെ അനുഗ്രഹത്തെ ഓർക്കാനും അതിന് നന്ദി പറയാനും അവർ സദസ്സുകൾ സംഘടിപ്പിച്ചിരുന്നു.

ഇതിന് തെളിവായി ഇമാം അഹ്മദും ഇമാം നസാഇയും റിപ്പോർട്ട് ചെയ്ത ഒരു ഹദീസ് കാണാം. നബി (സ) തന്റെ സ്വഹാബികളുടെ ഒരു സദസ്സിന്റെ അരികിലൂടെ കടന്നുപോയപ്പോൾ, അവർ എന്തിനാണ് ഇരിക്കുന്നതെന്ന് ചോദിച്ചു.

അവർ പറഞ്ഞു: “അല്ലാഹുവിനോട് ദുആ ചെയ്യാനും, അവൻ ഞങ്ങളെ ഇസ്‌ലാമിലേക്ക് മാർഗദർശനം ചെയ്തതിനും, അങ്ങയിലൂടെ ഞങ്ങൾക്ക് അനുഗ്രഹം നൽകിയതിനും അവനെ സ്തുതിക്കാനുമാണ് ഞങ്ങൾ ഇരിക്കുന്നത്.”

സ്വഹാബികൾ ഒരു പ്രത്യേക രീതിയിലുള്ള സംഗമം നടത്തിയിട്ടില്ല എന്നത് മാത്രം കൊണ്ട് ആ സംഗമം സ്വതവേ ഹറാമാണെന്ന് വിധിക്കാനാവില്ല. ഒരു കാര്യത്തിന്റെ അടിസ്ഥാനവും ലക്ഷ്യങ്ങളും ശരീഅത്തിന്റെ പൊതുതത്വങ്ങളോട് പൊരുത്തപ്പെടുകയും, അല്ലാഹുവിന്റെ അനുഗ്രഹങ്ങൾക്ക് നന്ദി പ്രകടിപ്പിക്കുക, നബി (സ) യുടെ സീറ പഠിക്കുക, അദ്ദേഹത്തോടുള്ള സ്നേഹവും ആദരവും വർധിപ്പിക്കുക തുടങ്ങിയ സൽകാര്യങ്ങളാണ് അതിലൂടെ ലക്ഷ്യമാക്കുന്നതെങ്കിൽ, സ്വഹാബികൾ അതേ പ്രത്യേക രൂപത്തിൽ അത് ചെയ്തിട്ടില്ല എന്നതുകൊണ്ട് മാത്രം അതിനെ നിരോധിതമായി കണക്കാക്കാനാവില്ല.

അവലംബം: ഡോ.സൈഫ് അലി അൽ അസ്റി